काठमाडौँ, २४ असार: अमेरिकाले होर्मुज स्ट्रेट हुँदै अघि बढिरहेका तीनवटा व्यावसायिक जहाजहरूमा इरानद्वारा गरिएको आक्रमणको जवाफमा शृङ्खलाबद्ध र शक्तिशाली हवाई हमला गरेको छ। युएस सेन्टकमका अनुसार अन्तर्राष्ट्रिय जलमार्गमा निर्दोष चालक दल रहेका जहाजहरूको रक्षा गर्न र इरानलाई जबाफदेही बनाउन यो सैन्य कारबाही सुरु गरिएको हो। अमेरिकी सेनाले इरानका ८० भन्दा बढी रणनीतिक लक्ष्यहरूमा सटिक हतियार प्रहार गरेको छ, जसमा हवाई रक्षा प्रणाली, राडार, एन्टि–सिप क्षेप्यास्त्र प्रणाली र ६० भन्दा बढी साना सैन्य डुङ्गाहरू सामेल छन्। इरानी सञ्चारमाध्यमहरूले दक्षिणी इरानका केश्म टापु, बन्दर अब्बास र खार्ग टापु जस्ता व्यावसायिक तथा सैन्य बन्दरगाहहरूमा ठुला विस्फोटहरू भएको पुष्टि गरेका छन्।

यस भीषण आक्रमणपछि इरानको सैन्य मुख्यालयले अमेरिकी कदमलाई खुला अतिक्रमण भन्दै विनाशकारी जवाफ दिने चेतावनी दिएको छ। इरानका संसदका सभामुख मोहम्मद बाकर गालिबाफ र विदेशमन्त्री अब्बास अराघचीले धम्की र जबर्जस्तीको युग समाप्त भइसकेकाले दबाबका बीच अमेरिकासँग कुनै पनि वार्ता र सम्झौता नहुने स्पष्ट पारेका छन्। यही तनावका बीच अमेरिकाले इरानी तेल निर्यातमा दिएको अस्थायी छुट फिर्ता लिएपछि अन्तर्राष्ट्रिय बजारमा कच्चा तेलको मूल्य २.७ प्रतिशतले बढेर प्रति ब्यारेल ७२.४० डलर पुगेको छ। यो सैन्य टकरावले भर्खरै तेहरान र वासिङ्टनबीच भएको सम्झौता उल्लङ्घन मात्र गरेको छैन, बरु सम्पूर्ण मध्यपूर्व क्षेत्रलाई नै पुनः ठुलो युद्धको जोखिममा धकेलिदिएको छ।