काठमाडौं : मध्यपूर्व क्षेत्रमा पछिल्ला दिनमा देखिएको तनाव क्रमशः कम हुँदै गएसँगै पेट्रोलियम निर्यातकर्ता देशहरूको समूह ओपेक प्लसले कच्चा तेलको उत्पादन कोटा थप बढाउने तयारी गरेको छ। अन्तर्राष्ट्रिय समाचार संस्था एएफपीका अनुसार विश्लेषकहरूले आगामी बैठकबाट उत्पादन विस्तारसम्बन्धी निर्णय आउने सम्भावना औँल्याएका छन्।

साउदी अरेबिया, रसियालगायत सात प्रमुख सदस्य राष्ट्रले अगस्ट महिनाको उत्पादन कोटाबारे अनलाइन बैठकमार्फत छलफल गर्ने कार्यक्रम तय भएको छ। उक्त बैठकले विश्व बजारमा तेल आपूर्ति र मूल्यको आगामी दिशाबारे महत्वपूर्ण संकेत दिने अपेक्षा गरिएको छ।

स्विस बैंक युबिएसका कमोडिटी विश्लेषक जियोभानी स्टौनोभोका अनुसार ओपेक प्लसले अघिल्ला महिनादेखि क्रमशः फिर्ता लिँदै आएको उत्पादन कटौतीलाई थप खुकुलो बनाउँदै दैनिक करिब एक लाख ८८ हजार ब्यारेल उत्पादन वृद्धि गर्न सक्ने सम्भावना छ। यसले अन्तर्राष्ट्रिय बजारमा तेलको आपूर्ति थप सहज बनाउने अपेक्षा गरिएको छ।

हालै मध्यपूर्वमा भएको द्वन्द्वका कारण विश्वकै महत्वपूर्ण समुद्री मार्ग ‘स्ट्रेट अफ होर्मुज’ प्रभावित हुँदा तेल आपूर्तिमा अवरोध सिर्जना भएको थियो। तर इरान र अमेरिकाबीच भएको पछिल्लो समझदारीपछि समुद्री यातायात सामान्य बन्दै गएको र तेल आपूर्ति पुनः सहज हुन थालेको विश्लेषकहरूको भनाइ छ। यसको प्रभावस्वरूप अन्तर्राष्ट्रिय बजारमा कच्चा तेलको मूल्य पनि युद्धअघि रहेको स्तरतर्फ फर्किन थालेको छ।

स्याक्सो बैंकका विश्लेषक ओले ह्यान्सेनले रोकिएको उत्पादन पूर्ण रूपमा पुनः सञ्चालन हुन केही समय लाग्ने भए पनि निकट भविष्यमा उत्पादन वृद्धिको गति अझ तीव्र हुन सक्ने संकेत गर्नुभएको छ।

यद्यपि विशेषज्ञहरूले आगामी वर्ष विश्व बजारमा तेलको आपूर्ति मागभन्दा बढी हुन सक्ने अनुमान गरेका छन्। साथै उत्पादन क्षमता पुनः मूल्याङ्कन, सदस्य राष्ट्रबीच कोटा बाँडफाँट तथा उत्पादन व्यवस्थापनजस्ता विषय ओपेक प्लसभित्र चुनौतीपूर्ण बन्न सक्ने चेतावनी पनि दिएका छन्।