काठमाडौँ, २३ असार: राष्ट्रिय वाणिज्य बैंक लिमिटेडले विभिन्न शाखा कार्यालयहरूको आन्तरिक पूर्वाधार निर्माण, मुद्रण सामाग्री आपूर्ति तथा परामर्श सेवाका लागि परेका बोलपत्रहरूमध्ये प्राविधिक र आर्थिक रूपमा उत्कृष्ट बोलपत्रदाताहरूको प्रस्ताव स्वीकृत गर्ने आशयको सूचना सार्वजनिक गरेको छ। बैंकको केन्द्रीय कार्यालय सिंहदरबार प्लाजास्थित सामान्य सेवा विभागले चालु आर्थिक वर्षको स्वीकृत कार्यक्रमअनुसार आह्वान गरिएका विभिन्न बोलपत्रहरूको मूल्याङ्कन प्रक्रिया पूरा गरी सार्वजनिक खरिद ऐन २०६३ को दफा २७ को उपदफा २ को प्रयोजनार्थ यो सूचना जारी गरेको हो। विभिन्न मितिमा राष्ट्रिय दैनिक पत्रिका तथा सार्वजनिक खरिद अनुगमन कार्यालयको विद्युतीय प्रणालीमार्फत आह्वान गरिएका ती बोलपत्रहरूमध्ये न्यूनतम मूल्याङ्कित र सारभूत रूपमा प्रभावग्राही देखिएका कम्पनीहरूलाई छनोट गरिएको बैंकले जनाएको छ।

बैंकले पुतलीसडक शाखाको आन्तरिक सजावट तथा निर्माण कार्य, बैंकका कर्मचारीहरूको सामूहिक दुर्घटना बीमा, कार्यालयका लागि आवश्यक मुद्रण सामाग्री तथा फारमहरूको आपूर्ति र सूचना प्रविधि प्रणाली परीक्षणका लागि परामर्श सेवा प्रदान गर्ने बोलपत्रदाताहरूको सूची स्वीकृतिका लागि छनोट गरेको छ। यस निर्णयअनुसार तोकिएका बोलपत्रदाताहरूले कबोल गरेको न्यूनतम रकम र शर्तहरू बैंकको नियमानुसार उपयुक्त पाइएकाले सम्झौता प्रक्रिया अघि बढाउन लागिएको हो। यो आशयको सूचना प्रकाशित भएको मितिले सात दिनभित्र चित्त नबुझ्ने अन्य बोलपत्रदाताहरूले खरिद ऐनको कानुनी प्रावधानअनुसार बैंकमा उजुरी दिन सक्ने व्यवस्था समेत रहेको छ। तोकिएको समयावधिभित्र कुनै उजुरी नपरेमा छनोट भएका कम्पनीहरूसँग बैंकले औपचारिक सम्झौता गरी कार्यदेश दिने प्रक्रिया सुरु गर्ने छ।