काठमाडौँ, २४ असार: मातृभूमि लघुवित्त वित्तीय संस्था लिमिटेडले आफ्नो सातौँ वार्षिक साधारण सभा आह्वान गरेको छ। संस्थाको सञ्चालक समितिको निर्णयानुसार उक्त सभा आगामी साउन १६ गते शुक्रबार बिहान ११ बजे काभ्रेपलाञ्चोकको बनेपास्थित बनेपा पार्टी भेन्युमा बस्नेछ। सभा भौतिक तथा अनलाइन दुवै माध्यमबाट एकैसाथ सञ्चालन गरिनेछ। साधारण सभा प्रयोजनका लागि साउन २ गतेदेखि साउन १६ गतेसम्म बुक क्लोज हुने भएकाले साउन १ गतेसम्म नेप्सेमा कारोबार भई कायम रहेका शेयरधनीहरू मात्र सभामा भाग लिन योग्य हुनेछन्।

साधारण सभामा आर्थिक वर्ष २०८०/८१ को सञ्चालक समितिको वार्षिक प्रतिवेदन, लेखापरीक्षकको प्रतिवेदनसहितको वासलात, नाफा नोक्सान हिसाब तथा नगद प्रवाह विवरणमाथि छलफल गरी पारित गरिनेछ। यसैगरी आर्थिक वर्ष २०८१/८२ का लागि लेखापरीक्षकको नियुक्ति र निजको पारिश्रमिक निर्धारण गर्ने प्रस्ताव समेत पेस हुनेछ। संस्थाले शेयरधनीहरूका लागि लाभांश तथा बोनस शेयर जारी गर्ने सम्बन्धी प्रतिवेदनलाई पनि निर्णयार्थ प्रस्तुत गर्ने जनाएको छ।

सभाको विशेष प्रस्तावअन्तर्गत मातृभूमि लघुवित्तले अन्य उपयुक्त लघुवित्त वित्तीय संस्थासँग मर्जर वा प्राप्ति प्रक्रियामा जाने विशेष प्रस्ताव पारित गर्नेछ। यसका लागि उपयुक्त संस्था पहिचान गर्ने, समझदारीपत्रमा हस्ताक्षर गर्ने लगायतका सम्पूर्ण कार्य गर्न सञ्चालक समितिलाई पूर्ण अख्तियारी प्रदान गरिनेछ। साथै संस्थाको प्रबन्धपत्र र नियमावलीमा समसामयिक संशोधन गर्ने तथा नियमनकारी निकायको निर्देशन बमोजिम परिमार्जन गर्न समितिलाई जिम्मेवारी दिने प्रस्तावमाथि छलफल हुनेछ।