काठमाडौँ, २३ असार: प्रधानमन्त्री बालेन शाहसँग एसियाली विकास बैंक का अध्यक्ष मासातो कान्दाले सिंहदरबारस्थित प्रधानमन्त्री कार्यालयमा शिष्टाचार भेटवार्ता गर्नुभएको छ। जेनजी आन्दोलनपश्चात नयाँ प्रधानमन्त्रीका रूपमा बालेन शाहले कार्यभार सम्हालेलगत्तै भएको यस भेटमा नेपालको समग्र विकास, आपसी हित र बैंकले पुर्‍याउँदै आएको वित्तीय सहयोगका विविध पक्षमा गहन छलफल भएको हो। अध्यक्ष कान्दाले यसअघि नै सामाजिक सञ्जाल एक्समार्फत नेपालको विकासका प्राथमिकताहरूमा बैंकले निरन्तर सहयोग गर्ने प्रतिबद्धता व्यक्त गर्नुभएको थियो।

अध्यक्ष कान्दाको यसै नेपाल भ्रमणको सुअवसरमा नेपाल सरकार र एसियाली विकास बैंकबीच १६ करोड ५० लाख अमेरिकी डलर अर्थात् करिब २५ अर्ब रुपैयाँ बराबरको सहुलियतपूर्ण ऋण सम्झौतासमेत सम्पन्न भएको छ। अर्थमन्त्री डाक्टर स्वर्णिम वाग्ले र बैंकका अध्यक्ष कान्दाको उपस्थितिमा सोमबार दुई ठूला विकास आयोजनामा लगानी गर्ने सम्बन्धी सो वित्तीय सम्झौतामा हस्ताक्षर भएको हो। नेपालका तर्फबाट अर्थसचिव डाक्टर घनश्याम उपाध्याय र बैंकका तर्फबाट नेपालस्थित आवासीय नियोगका देशीय निर्देशक आनो कुश्वाले उक्त सम्झौता पत्रमा हस्ताक्षर गर्नुभएको छ।