काठमाडौं, १२ साउनः अर्थमन्त्री स्वर्णम वाग्लेले  चालु आर्थिक वर्षका लागि १६ खर्ब रुपैयाँको महत्वाकांक्षी राजस्व लक्ष्य प्राप्त गर्न राजस्व प्रशासनलाई ’मिसन मोड’ मा काम गर्न निर्देशन दिनु भएको छ । शविनवार अर्थमन्त्रालयमा आयोजिक राजश्व समिक्षा गोष्ठीलाई सम्बोधन गर्दै उहाँले सो निर्देशन दिनु भएको हो ।
स्पष्ट लक्ष्य, मापदण्ड र समयसीमा तोकेर अघि बढ्न कर्मचारीहरूलाई आह्वान गर्नुभएको थियो । अर्थमन्त्री वाग्लेले नीति तथा कार्यक्रम र बजेटमा समेत ’मिसन मोड’ को अवधारणा आएको उल्लेख गर्दै राजस्व प्रशासनलाई यसको सफल उदाहरणका रूपमा स्थापित गर्नुपर्नेमा जोड दिनुभयो । उहाँले मुलुकको कुल गार्हस्थ्य उत्पादन (जीडीपी) र उपभोगको ट्रेन्ड हेर्दा राजस्व संकलनको लय बिग्रिएको भन्दै राजस्व चुहावट नियन्त्रण र दायरा विस्तारमा लाग्नुपर्ने बताउनुभयो । 
सरकारले यसअघि पनि विभिन्न आर्थिक सुधारका कार्यक्रमहरू ’मिसन’ का रूपमा अघि सारे पनि कार्यान्वयन पक्ष कमजोर हुँदा लक्ष्य प्राप्तिमा असफल भएको इतिहास छ । १६ खर्बको लक्ष्य भेट्टाउन भन्सार छली, कर छली र अनौपचारिक अर्थतन्त्रलाई नियन्त्रण गर्नुका साथै नयाँ कर स्रोतको पहिचान आवश्यक रहेको विज्ञहरू बताउँछन् । साथै, आर्थिक गतिविधि सुस्ताउँदै गएको बेला मात्रै राजस्व वृद्धिको जोड दिँदा करदाताहरूमा थप दबाब पर्न सक्ने सम्भावनालाई पनि सरकारले गम्भीरतापूर्वक लिनुपर्ने देखिन्छ ।