काठमाडौं, १० साउन — देशका विभिन्न स्थानमा पछिल्लो २४ घण्टामा भएका विपद्का ४१ घटनामा तीन जनाको मृत्यु भएको छ भने १९ जना घाइते भएका छन्।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको दैनिक बुलेटिनअनुसार तीनै जनाको मृत्यु पहिरोका घटनामा भएको हो। साउन ९ गते बिहान १० बजेदेखि साउन १० गते बिहान १० बजेसम्म पहिरोका १२ घटना भएका छन्। ती घटनामा दुई जना घाइते भएका छन् भने तीन जनाको उद्धार गरिएको छ।

सो अवधिमा सबैभन्दा धेरै सर्पदंशका १४ घटना भएका छन्। सर्पदंशबाट १४ जना घाइते भएका छन्। यस्तै, आगलागीका ६ घटनामा एक जना र जनावर आक्रमणका दुई घटनामा दुई जना घाइते भएका छन्।

प्राधिकरणका अनुसार अविरल वर्षाका पाँच र बाढीका दुई घटना भएका छन्। यी घटनामा मानवीय क्षति भएको विवरण बुलेटिनमा उल्लेख छैन।

विभिन्न विपद्का कारण ६ स्थानमा सडक अवरुद्ध भएको छ। सात चौपायाको क्षति भएको छ भने अनुमानित आर्थिक क्षति २३ लाख २३ हजार रुपैयाँ पुगेको छ। उद्धार तथा विपद् व्यवस्थापनका लागि १७५ प्रहरी परिचालन गरिएको प्राधिकरणले जनाएको छ।

प्राधिकरणको तथ्याङ्कअनुसार २०८३ वैशाख १ देखि साउन १० गतेसम्म देशभर तीन हजार ७७९ विपद्का घटना भएका छन्। ती घटनामा १८७ जनाको मृत्यु, तीन जना बेपत्ता र एक हजार ९२ जना घाइते भएका छन्। विपद्बाट चार हजार ८७६ परिवार प्रभावित भएका छन्।