काठमाडौँ, २१ असार: सिटिजन्स बैंक इन्टरनेसनल लिमिटेड कोष प्रबर्द्धक र सिटिजन्स क्यापिटल लिमिटेड योजना व्यवस्थापक रहेको सात वर्षे बन्दमुखी सामूहिक लगानी कोष योजना ‘सिटिजन्स म्युचुअल फण्ड २’ को निर्धारित समयावधि असार २१ गते समाप्त भएको छ। धितोपत्र सम्बन्धी ऐन र सामूहिक लगानी कोष नियमावली बमोजिम नेपाल धितोपत्र बोर्डबाट अनुमति प्राप्त गरी २०७६ असार २२ गतेदेखि सञ्चालनमा आएको यस योजनाको निर्धारित सञ्चालन अवधि आज सकिएकाले खारेजी प्रक्रिया अघि बढाइएको क्यापिटलले काठमाडौँमा सार्वजनिक सूचनामार्फत जानकारी दिएको छ। अवधि समाप्त भएसँगै यस योजनाका इकाईहरू नेपाल स्टक एक्सचेन्जबाट समेत सूचीकरण खारेज भई कारोबार पूर्ण रूपमा बन्द भइसकेका छन्।

नियमावलीको स्थापित कानुनी व्यवस्थाअनुसार योजना खारेजीमा गएपछि यस अन्तर्गत रहेका सम्पूर्ण सम्पत्तिहरूलाई नगदमा रूपान्तरण गरिने योजना व्यवस्थापकले जनाएको छ। उक्त सम्पत्ति व्यवस्थापन भइसकेपछि इकाईधनीहरूलाई उनीहरूको स्वामित्वको हिस्साका आधारमा भुक्तानी गरिने र सोको विस्तृत विवरण आगामी दिनमा सार्वजनिक सूचनामार्फत नै सूचित गरिने स्पष्ट पारिएको छ। यसैबीच, क्यापिटलले विभिन्न आर्थिक वर्षमा वितरण गरिएको नगद लाभांश लिन बाँकी रहेका इकाईधनीहरूलाई यथाशीघ्र आफ्नो हितग्राही खातामा बैंक खाता अद्यावधिक गर्न आग्रह गरेको छ।

साथै, आफ्ना इकाईहरू बैंक तथा वित्तीय संस्थामा धितो राखी कर्जा सुविधा लिएका इकाईधनीहरूले फुकुवा पत्र अनिवार्य रूपमा बुझाउनुपर्ने व्यवस्था गरिएको छ। यो समाचार तयार पार्दासम्म योजनाको पछिल्लो प्रतिइकाई खुद सम्पत्ति मूल्य ९ असार २०८३ को तथ्याङ्कअनुसार १० रुपैयाँ ६ पैसा कायम रहेको थियो। निर्धारित सात वर्षको अवधि पूरा गरेर विधिपूर्वक बन्द हुन लागेको यस फण्डको खारेजी प्रक्रिया पारदर्शी र नियमसंगत ढंगले सम्पन्न गरिने क्यापिटलको दाबी छ।