काठमाडौँ, २१ असार: नेपाल राष्ट्र बैंकबाट इजाजतपत्र प्राप्त राष्ट्रिय स्तरको नाडेप लघुवित्त वित्तीय संस्था लिमिटेडले आर्थिक वर्ष २०८१/८२ को चौथो त्रैमासको अपरिष्कृत वित्तीय विवरण काठमाडौँमा सार्वजनिक गरेको छ। संस्थाले नेपाल राष्ट्र बैंकको एकीकृत निर्देशन बमोजिम सर्वसाधारणको जानकारीका लागि सार्वजनिक गरेको विवरण अनुसार असार मसान्तसम्म संस्थाको कुल सम्पत्ति बढेर ६ अर्ब ३८ करोड ३ लाख ४७ हजार ४६४ रुपैयाँ पुगेको छ। अघिल्लो आर्थिक वर्षको सोही अवधिमा संस्थाको कुल सम्पत्ति ६ अर्ब ३४ लाख ८६ हजार १४ रुपैयाँ रहेको विवरणले देखाउँछ।

वित्तीय संस्थाको व्यावसायिक कारोबारतर्फ ग्राहकहरूबाट संकलन हुने निक्षेप परिचालन र कर्जा प्रवाह दुवैमा वृद्धि भएको प्रतिवेदनमा उल्लेख छ। विवरण अनुसार समीक्षा अवधिमा संस्थाले ग्राहकहरूबाट १ अर्ब ९१ करोड ८६ लाख ८६ हजार ७६३ रुपैयाँ निक्षेप संकलन गरी ५ अर्ब ९४ करोड ७८ लाख ३७ हजार ७७१ रुपैयाँ कर्जा तथा सापट लगानी गरेको छ। अघिल्लो वर्षको सोही अवधिमा संस्थाको निक्षेप १ अर्ब ७५ करोड ६२ लाख १५ हजार १३२ रुपैयाँ र कर्जा लगानी ५ अर्ब ७० करोड २९ लाख ६४ हजार १३० रुपैयाँ रहेको थियो। संस्थाको कुल दायित्व ५ अर्ब ५६ करोड ५४ लाख १ हजार ८८४ रुपैयाँ र कुल इक्विटी ८१ लाख ४९ लाख ४५ हजार ५८० रुपैयाँ कायम भएको वित्तीय प्रतिवेदनले स्पष्ट पारेको छ।