काठमाडौँ । ज्योति विकास बैङ्क लिमिटेडले डिजिटल सेवा प्रवद्र्धन र ग्राहक मैत्री सेवा प्रदान गर्ने प्रतिवद्धतालाई निरन्तरता दिंदै इन्टर बैङ्क टेलर क्यूआर भुक्तानी सेवा सञ्चालनमा ल्याएको छ ।
बैङ्कले स्थापनाको १७ औं वार्षिकोत्सवको अवसरमा उक्त सेवा  सञ्चालनमा ल्याएको हो । डिजिटल सेवाको माध्यमबाट अब ज्योति विकास बैङ्कमा खाता नभएका नागरिकहरुले पनि आफ्नो सम्बन्धित बैङ्कको मोबाइल बैङ्किङ एपको प्रयोगबाट ज्योति विकास बैङ्कको जुनसुकै शाखामा गई नगद निकाल्न सक्नेछन् ।
बैङ्कको शाखाहरुमा रहेको तोकिएको क्यूआरलाई स्क्यान गरी नगद निकाल्न पाइने यस सुविधाले आम नागरिकहरुलाई थप सहजता हुने विश्वास बैङ्कले लिएको छ ।
यो सेवा उपयोग गर्न, सेवाग्राहीको नेपालभित्रको जुनसुकै बैङ्क तथा वित्तीय संस्थामा खाता तथा सो खातासँग सम्बन्धित मोबाइल बैङ्किङ सुविधा सक्रिय रहेको हुनुपर्छ । ज्योति विकास बैङ्कमै खाता हुनुपर्छ भन्ने छैन ।
यस भुक्तानी सेवा प्रयोग गर्नलाई ग्राहकले आफ्नो वैध परिचयपत्र अनिवार्य रुपमा प्रस्तुत गर्नुपर्छ । एटीएम अथवा आफ्नो सम्बन्धित बैङ्कको शाखा पायक नपरेको अवस्थामा ज्योति विकास बैङ्कमा खाता नभएता पनि यो सुविधा उपलब्ध हुने छ ।
ज्योति विकास बैङ्कले डिजिटल प्रविधिको प्रयोगमार्फत ग्राहकको सुविधा, पहुँच र सन्तुष्टिमा केन्द्रित रही आधुनिक बैङ्किङको दिशामा सार्थक कदम अघि बढाउने उद्देश्यपूर्ति स्वरुप यो सेवा पनि थप गरेको जनाएको हो । भविष्यमा अझ प्रभावकारी र नविनतम समाधानमार्फत ग्राहक सेवालाई थप सशक्त बनाउँदै लैजाने बैङ्कको दिगो प्रतिबद्धता रहेको छ ।