साझा अर्थ संवाददाता
६ साउन २०८३, बुधवार
काठमाडौँ, ६ साउन: झापास्थित मेची भन्सार कार्यालयले गत आर्थिक वर्ष २०८२/८३ मा १७ अर्ब ६७ करोड रुपैयाँ राजस्व संकलन गरेको छ। यो संकलन अघिल्लो आर्थिक वर्ष २०८१/८२ को तुलनामा ११ प्रतिशतले बढी हो। अघिल्लो आवमा सो कार्यालयले १५ अर्ब ९३ करोड रुपैयाँ मात्र राजस्व उठाएको थियो, जसअनुसार यस वर्ष १ अर्ब ७४ करोड रुपैयाँ बढी राजस्व संकलन गर्न सफल भएको छ।
राजस्व संकलनमा प्रतिशतगत रूपमा वृद्धि देखिए पनि कार्यालयले सरकारले राखेको वार्षिक लक्ष्य भने भेट्न सकेन। सरकारले गत आवका लागि १८ अर्ब ८७ करोड रुपैयाँको राजस्व संकलन गर्ने लक्ष्य निर्धारण गरेको थियो। कार्यालयका अनुसार यो लक्ष्यको करिब ९३ प्रतिशत मात्र उपलब्धि हासिल भएको छ।
यस भन्सार नाकाबाट मुख्यतया पेट्रोलियम पदार्थ, लत्ताकपडा, रासायनिक पदार्थ तथा विभिन्न औद्योगिक कच्चा पदार्थहरूको आयात हुने गरेको छ। त्यसैगरी, पूर्वी नेपालबाट चिया, अदुवा र अम्रिसो लगायतका प्रमुख कृषिजन्य वस्तुहरूको निर्यात यसै नाका भएर हुने गरेको भन्सार कार्यालयले जनाएको छ।
