काठमाडौं, २६ असार: नेपाली सुनचाँदी बजारमा आज सुनको मूल्यमा उल्लेख्य वृद्धि भएको छ। नेपाल सुनचाँदी व्यवसायी महासंघका अनुसार आज छापावाला सुनको मूल्य प्रतितोला २ हजार ७ सय रुपैयाँले बढेर २ लाख ८७ हजार ४ सय रुपैयाँ कायम भएको छ। अघिल्लो दिन छापावाला सुन प्रतितोला २ लाख ८४ हजार ७ सय रुपैयाँमा कारोबार भएको थियो।

यसैगरी, तेजाबी सुनको मूल्य पनि तोलामा २ हजार ७ सय रुपैयाँले नै बढेर २ लाख ८६ हजार ७ सय रुपैयाँ पुगेको छ। बिहीबार तेजाबी सुन प्रतितोला २ लाख ८४ हजार रुपैयाँमा खरिदबिक्री भएको महासंघले जनाएको छ।

सुनसँगै आज चाँदीको मूल्यमा पनि वृद्धि भएको छ। चाँदीको मूल्य प्रतितोला १७० रुपैयाँले बढेर ४ हजार ५ सय १० रुपैयाँ पुगेको छ। अघिल्लो दिन चाँदी प्रतितोला ४ हजार ३ सय ४० रुपैयाँमा कारोबार भएको थियो।