काठमाडौँ , २९ असार: साताको पहिलो कारोबार दिन आज असार २९ गते सोमबार नेपाल स्टक एक्सचेन्ज परिसूचकमा ठुलो अंकको गिरावट दर्ता भएको छ। बजार खुला भएसँगै सुरु भएको बिक्री चापका कारण नेप्से सूचक ३०.६० अंक अर्थात् १.१७ प्रतिशतले ओरालो लाग्दै २५७०.१८ को विन्दुमा झरेर बन्द भएको छ। यो गिरावटसँगै बजारले पछिल्लो समय कायम राखेको २६०० को मनोवैज्ञानिक सपोर्ट विन्दुलाई तोडेको छ।

परिसूचकमा उच्च गिरावट देखिए तापनि पूँजी बजारमा टर्नओभर ले भने नयाँ उचाइ लिएको छ। आज दिनभर बजारमा कुल ४ करोड १७ लाख २५ हजार ३२३ कित्ता सेयरहरू खरिदबिक्री हुँदा कुल ७ अर्ब ४६ करोड ८४ लाख १६ हजार ११६ रुपैयाँ बराबरको भारी कारोबार भएको छ।

बजार सूचक घट्दा पनि टर्नओभर ७.४६ अर्ब पार गर्नुले तल्लो विन्दुमा आक्रामक खरिदकर्ताहरू सक्रिय रहेको र लगानीकर्ताहरू तीव्र रूपमा पोर्टफोलियो परिवर्तन गर्न व्यस्त रहेको संकेत गर्दछ। साताको पहिलो दिन करेक्सन देखिए पनि उच्च टर्नओभरका कारण आगामी दिनहरूमा बजारले नयाँ दिशा लिने विश्लेषकहरूको अनुमान छ।