काठमाडौं । चालु आर्थिक वर्ष २०८१/८२ को पाँच महिनामा १२४ खर्ब ४४ अर्ब ३० करोड रुपियाँ कारोबारमा आधारित तरलता प्रशोचन गरिएको छ ।
नेपाल राष्ट्र बैंकले निक्षेप संकलन बोलकबोलमार्फत ११ खर्ब ११ अर्ब ८५ करोड र स्थायी निक्षेप सुविधामार्फत ११३ खर्ब ३२ अर्ब ४५ करोड गरी कुल १२४ खर्ब ४४ अर्ब ३० करोड (कारोबारमा आधारित) तरलता प्रशोचन गरेको हो ।
राष्ट्र बैंक आर्थिक अनुसन्धान विभागको आर्थिक वर्ष २०८१/८२ को पाँच महिनाको तथ्याङ्कमा आधारित देशको वर्तमान आर्थिक तथा वित्तीय स्थितिका अनुसार अघिल्लो वर्षको सोही अवधिमा ओभरनाइट तरलता सुविधा र स्थायी तरलता सुविधा लगायतका उपकरणहरुमार्फत खुद तीन खर्ब ८६ अर्ब ८६ करोड तरलता प्रवाह गरिएको थियो । समीक्षा अवधिमा राष्ट्र बैंकले विदेशी विनिमय बजार (वाणिज्य बैंकहरु) बाट अमेरिकी डलर दुई अर्ब २३ करोड खुद खरिद गरी दुई खर्ब ९९ अर्ब ९५ करोड तरलता प्रवाह गरेको छ । अघिल्लो वर्षको सोही अवधिमा विदेशी विनिमय बजारबाट अमेरिकी डलर दुई अर्ब २८ करोड खुद खरिद गरी तीन खर्ब दुई अर्ब ८९ करोड तरलता प्रवाह गरिएको थियो ।
समीक्षा अवधिमा अमेरिकी डलर एक अर्ब ६४ करोड बिक्री गरी दुई खर्ब २१ अर्ब एक करोड बराबरको भारतीय रुपियाँ खरिद भएको छ । अघिल्लो वर्षको सोही अवधिमा अमेरिकी डलर एक अर्ब ३८ करोड बिक्री गरी एक खर्ब ८३ अर्ब ५१ करोड बराबरको भारतीय रुपियाँ खरिद भएको थियो ।