त्रिभुवन अन्तराष्ट्रिय विमानस्थलको स्तरोन्नति गर्न सञ्चालन समय १० घण्टा कटौती गरिएपछि अन्तराष्ट्रिय हवाई भाडामा चर्को मूल्य बृद्धि भएको छ । अन्तराष्ट्रिय उडान संख्या कटौती हुँदा हवाई भाडामा तीन सय प्रतिशतसम्म बृद्धि भएको छ । सबैभन्दा बढी काठमाडौं दिल्ली उडानमा भाडा बृद्धि गरिएको छ । काठमाडौबाट दिल्लीको उडानमा एक तर्फी १० देखि १५ हजार रुपैयाँ पर्ने हवाइ भाडा अहिले एक तर्फीनै ४० हजार रुपैयाँ पुगेको छ । 

यसको प्रमुख असर विदेश जाने नेपालीलाई परेको छ । हाल दैनिक १ हजार ५ सय बढी नेपाली युवाहरु त्रिभुवन अन्तराष्ट्रिय विमानस्थल हुँदै वैदेशिक रोजगारीमा जाने गरेका छन् । 
त्यस्तै, कतारको एक तर्फी हवाई भाडा नै एक लाख रुपैयाँ पुगेको छ । यसअघि कतारको दुईतर्फको हवाई टिकटको शुल्क ५० हजार रुपैयाँ थियो ।  

दुबईको एक तर्फ ८५ हजार रुपैयाँ पुगेको छ । यसअघि दुई तर्फी उडानको ५५ हजार रुपैयाँ थियो । मलेसियाको एकतर्फी ८० हजार रुपैयाँ पुगेको छ । यसअघि एक तर्फीको टिकट ४८ हजार रुपैयाँ थियो । कुवेतको एकतर्फी शुल्क नै ७० हजार रुपैयाँ पुगेको छ । यस अघि भने ३५ हजार रुपैयाँ थियो ।