काठमाडौँ, ०६ जेठ:धितोपत्र बजार परिसूचक नेप्सेमा आज जेठ ६ गते बुधबार दोहोरो अङ्कको उत्साहजनक सुधार देखिएको छ। नेपाल स्टक एक्सचेन्ज परिसूचक ३०.०८ अङ्क अर्थात् १.१० प्रतिशतले बढेर २,७५४.४८ को बिन्दुमा पुगेर बन्द भएको छ। अघिल्लो कारोबार दिन परिसूचक ६.५१ अङ्कले घटेर २,७२४.३९ को बिन्दुमा सीमित भएको थियो।

परिसूचकसँगै आज बजारमा कारोबार रकममा पनि राम्रो सुधार आएको छ। आज दिनभर भएका कारोबारमा १ करोड ६ लाख ६१ हजार ४ सय ७६ कित्ता सेयर खरिद-बिक्री हुँदा कुल ३ अर्ब ८२ करोड ८ लाख ९६ हजार ९ सय ६६ रुपैयाँ ८५ पैसा बराबरको कारोबार भएको छ। बैंकहरूमा ब्याजदर सस्तो हुनु र तरलता सहज हुनुले लगानीकर्ताको मनोबल बढाउँदा आजको बजारमा सकारात्मक प्रभाव देखिएको हो।