साझा अर्थ संवाददाता
१८ कार्तिक २०८२, मङ्गलवार
काठमाडौं । नेपाली कांग्रेसमा महाधिवेशन गर्ने विषयमा बढेको विवाद जारी रहेको समयमा आज केन्द्रीय समितिको बैठक बस्दैछ ।
विवादकै बीचमा आज दिउँसो १ बजेदेखि बस्ने केन्द्रीय समितिको बैठकमा महामन्त्री गगन थापाले १५औं महाधिवेशनको कार्यतालिका पेश गर्ने तयारी गरेका छन् । महामन्त्री थापाले महाधिवेशनको कार्यतालिका पेश गर्ने तयारी गरेपछि संस्थापन पक्षले पनि उनलाई काउन्टर दिने गरि कार्यतालिका पेश गर्ने बताइएको छ ।
महाधिवेशन गर्ने विषयमा संस्थापन पक्ष र इतर पक्षबीच विवाद हुदा यसअघि शुक्रबार र आइतबार बैठक नबसी स्थगित भएको बैठक आज बस्न लागेको हो ।
यसबीचमा भएका विभिन्न छलफलमा संस्थापन पक्षले फागुन २१ को निर्वाचन पछि महाधिवेशन गर्ने अडान लिएका छन् भने महामन्त्रीद्वयसहित इतर पक्षले सकेसम्म छिटो महाधिवेशन गर्नुपर्ने बताउदै आएको छ ।
कांग्रेसको अहिलेको केन्द्रीय समितिको पदावधि मङ्सिर महिना भित्र सकिदैछ ।
