काठमाडौंः नेपाल राष्ट्र बैंकले (आज) आइतवार ५० अर्ब निक्षेप खिच्न लागेको छ । अधिक तरलता ब्यवस्थापन गर्न राष्ट्र बैंकले सो रकम खिच्न लागेको हो । 
तरलता ब्यवस्थापनकालागि निक्षेप संकलन उपकरण बोलकबोलमार्फत राष्ट्र बैंकले निक्षेप खिच्न लागेको नेपाल राष्ट्रबैंकले जनाएको छ ।  
बोलकबोलमा राष्ट्र बैंकबाट इजाजतप्राप्त ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन् । दीर्घकालीन निक्षेप संकलन रकम बाँडफाँट गर्दा काउण्टर पार्टीहरूले बोल गरेका ब्याजदरअनुसार सबैभन्दा कम दर बोल गर्ने रकम प्राथमिकता क्रममा राखी आह्वान गरेको रकमसम्म क्रमशः बाँडफाँट गरिने बैंकको भनाई रहेको छ । 
सो रकमको २०८२ भदौ २९ गते भुक्तानी हुने छ । बोल कबोल गर्न सकिने रकम न्युनतम १० करोड रुपैयाँ र अधिकतम ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्म हुने जनाइएको छ ।