हाइड्रोइलेक्ट्रिसिटी इन्भेस्टमेन्ट एन्ड डेभलपमेन्ट कम्पनी लिमिटेडको लिलामीमा राखिएको संस्थापक सेयर बाँडफाँड भएको छ । उक्त सेयरको कटअफ मूल्य १४५.६ रुपैयाँ कायम भएको छ ।

कम्पनीको एक करोड ६८ लाख ५९ हजार ५० कित्ता सेयरका लिलामीका लागि गत साउन २९ गतेदेखि भदौ ६ गतेसम्म गोप्य सिलबन्दी मार्फत आवेदन माग गरिएको थियो । आज बिक्री प्रबन्धक ग्लोबल आइएमई क्यापिटल लिमिटेडको नक्सालमा रहेको कार्यालयमा बिहान ८ बजेदेखि सिलबन्दी खोली सेयर बाँडफाँड गरिएको हो ।

न्यूनतम मूल्य एक सय रुपैयाँ तोकिएको उक्त सेयरको लिलामी प्रक्रियामा कुल २५ सय जनाले आवेदन दिएका थिए । दोस्रो बजारमा हाल कम्पनीको संस्थापक समूहको सेयरको मूल्य १८४ रुपैयाँ रहेको छ । नेप्सेमा सूचीकरण भएपश्चात् आज बाँडफाँड भएको सेयर दोस्रो बजारमा कारोबार गर्न सकिनेछ ।