म्यानपावर व्यावसायीलाई राजदूतमा सिफारिस गरिएको भन्दै सांसद् यादवले गरे सरकारलाई प्रश्न

काठमाडौं । नेपाली कांग्रेसका सांसद् रामकृष्ण यादवले म्यानपावर व्यावसायीलाई राजदूत नियुक्तिका लागि सिफारिस गरिएको भन्दै सरकारलाई प्रश्न गरेका छन् ।

आज प्रतिनिधिसभाको बैठकमा सांसद् यादवले सरकारले स्वार्थ बाझिने गरी म्यानपावर व्यावसायी अबुसुफ्यान खानलाई साउदी अरबको राजदूतमा सिफारिस गरेको बताएका हुन् ।

गत शुक्रबार सरकारले साउदी अरबको राजदूतमा खानसहित बिभिन्न आठ देशका लागि राजदूत सिफारिस गरेको थियो । त्यसमध्ये खानको सिफारिस स्वार्थ बाझिने गरी भएको सांसद् यादवको दाबी छ ।

खानको सिफारिसपछि म्यानपावर व्यावसायी सशंकित भएको पनि उनले बताए । सांसद् यादवले भने, ‘म्यानपावर व्यावसायी आफैँ राजदूत भएर जाने भएपछि साउदीमा काम गर्ने म्यानपावर व्यावसायी सशंकित भएका छन् ।’