काठमाडाैः ईरानले आफ्ना आणविक स्थलहरूको निरीक्षणका लागि अन्तर्राष्ट्रिय आणविक ऊर्जा एजेन्सी (आईएईए) का निरीक्षकहरूलाई पहुँच दिन अस्वीकार गरेको छ। ईरानी संसदका अध्यक्ष मोहम्मद बाघेर गालिबाफले हालै बमबारीबाट प्रभावित भएका आणविक केन्द्रहरूमा विदेशी निरीक्षकहरूलाई कुनै पनि अवस्थामा प्रवेश नदिइने स्पष्ट पारेका छन्।

सरकारी टेलिभिजन आईआरआईबीसँगको कुराकानीमा गालिबाफले भने, ‘आईएईएको पहुँचसम्बन्धी समाचार पूर्णरूपमा गलत हुन्। ईरानको कानूनले यस्तो पहुँचलाई अनुमति दिँदैन।’ उनका अनुसार ईरानी संसद र सर्वोच्च राष्ट्रिय सुरक्षा परिषद्ले यस्तो कानून बनाएको छ, जसअन्तर्गत क्षतिग्रस्त आणविक स्थलहरूमा विदेशी निरीक्षकहरूको पहुँच पूर्णरूपमा निषेध गरिएको छ। हाल आईएईएलाई केवल बुशेहर आणविक ऊर्जा संयन्त्र र तेहरान अनुसन्धान रिएक्टरमा मात्र सीमित पहुँच दिइएको छ र ईरानले यही व्यवस्थालाई निरन्तरता दिने उनले बताए।

गालिबाफले स्विट्जरल्यान्डमा भएको वार्तामा ईरानको सहभागिताको समेत बचाउ गर्दै भने, ‘यी वार्ताले ईरानका केही सम्पत्ति रिहा गर्ने प्रक्रियालाई तीव्रता दियो र केही प्रतिबन्धहरू निलम्बन गर्न सहयोग पुर्यायो।’ यदि ईरान वार्तामा सहभागी नभएको भए सम्झौताका सर्तहरू अघि बढाउन सम्भव नहुने उनको तर्क छ।

ईरानी संसद अध्यक्षले देशलाई कूटनीति र सैन्य शक्ति दुवैको साथ अघि बढ्नुपर्ने बताए। ‘ईरानका शत्रुहरूले केवल शक्तिको भाषा मात्र बुझ्छन्, त्यसैले हामी बलियो रहनुपर्छ,’ उनले भने। उनले अमेरिकी राष्ट्रपति डोनाल्ड ट्रम्पको नाम लिँदै आलोचकहरूलाई ट्रम्पको भाषा नदोहोर्याउन र देशको जनतालाई शान्तिपूर्वक बाँच्न दिन आग्रह गरे।

गालिबाफले सबै ईरानीहरूको सेवा गर्नु आफ्नो जिम्मेवारी रहेको बताउँदै धर्म वा विचारको आधारमा कुनै भेदभाव नगरिने प्रतिबद्धता व्यक्त गरे। सरकारको प्राथमिकता आर्थिक समस्या समाधान, देशको सुरक्षा र राष्ट्रिय एकतालाई सुदृढीकरण गर्नु रहेको उनले स्पष्ट पारे। हालको परिस्थितिमा ईरानको लागि राष्ट्रिय एकता सबैभन्दा महत्वपूर्ण रहेको उनले जोड दिए। 

 स्राेतः अमरउजाला