काठमाडौँ, ०८ जेठ: बैंकिङ प्रणालीमा रहेको अधिक तरलता (लगानीयोग्य रकम) व्यवस्थापन गर्न केन्द्रीय बैंकले आज फेरि ठुलो परिमाणको रकम तान्ने भएको छ। नेपाल राष्ट्र बैंकले बैंक तथा वित्तीय संस्थाहरूबाट बोलकबोल (बिडिङ) प्रक्रियामार्फत १०० अर्ब रुपैयाँ बराबरको निक्षेप सङ्कलन गर्न लागेको हो।

बजारमा रकम बढी भएर अल्पकालीन ब्याजदरहरू घट्न थालेपछि राष्ट्र बैंकले निक्षेप संकलन उपकरणको प्रयोग गर्दै बजारबाट पैसा उठाउन लागेको हो। यस निक्षेप सङ्कलन उपकरणको बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्थाहरू सहभागी हुन पाउनेछन्। इच्छुक संस्थाहरूले आज तोकिएको समयभित्र अनलाइन प्रणालीमार्फत आफ्नो ब्याजदर प्रस्ताव गर्नुपर्नेछ। बजारको अधिक तरलतालाई सन्तुलनमा राख्न र अल्पकालीन ब्याजदरलाई एउटा निश्चित सीमाभित्र कायम राख्न केन्द्रीय बैंकले यस्तो कदम चालेको हो।