काठमाडौं । अब बैंक तथा वित्तिय संस्थाहरूले मुस्ताङ नाकाबाट आयात गरिने वस्तुमा पनि एलसीको सुविधा पाउने भएका छन् ।
बैंक तथा वित्तिय संस्थाहरूले चिनियाँ भूभागबाट आएर मुस्ताङको भन्सार कार्यालयबाट जाँचपास तथा आयात हुने वस्तुका लागि पनि प्रतितपत्र (एलसी) खोलिने भएको छ ।
नेपाल राष्ट्र बैंकले मङ्गलबार एकीकृत परिपत्र–२०८१ संसोधन गर्दै यस्तो व्यवस्था गरेको हो । नयाँ व्यवस्था अनुसार एलसी खोलिसकेको अवस्थामा पनि मुस्ताङ भन्सारबाट जाँचपास गर्न सकिने भएको छ ।
यसअघि चिनियाँ भूभागबाट आउने वस्तु तातोपानी भन्सार, सिन्धुपाल्चोक र रसुवा भन्सार, रसुवाबाट जाँचपास हुने भएमा मात्रै एलसीको सुविधा दिने व्यवस्था थियो । अहिले राष्ट्र बैंकले मुस्ताङ भन्सारका लागि पनि यो सुविधा दिने व्यवस्था गरेको हो ।
‘‘चिनियाँ भूभाग भई ट्रक वा रेलमार्गबाट प्रतीतपत्रमार्फत आयात गर्दा निम्न भन्सार नाकाहरूबाट सामान आयात गर्नु पर्नेछ । क. तातोपानी भन्सार (सिन्धुपाल्चोक), ख. रसुवा भन्सार, (रसुवा) र मुस्ताङ्ग भन्सार (मुस्ताङ्ग),’’ परिपत्रमा भनिएको छ ।
गत असार २३ गते रसुवामा आएको बाढीले रसुवा भन्सार क्षतिग्रस्त बनाएको छ । चीनतर्फको व्यापारमा सोही भन्सार कार्यालय बढी प्रयोग हुन्छ । तर, बाढीले उक्त भन्सार कार्यालय क्षतिग्रस्त गराएपछि चीनतर्फको व्यापार प्रभावित भइरहेको छ । त्यससँग जोडिएका सडक पनि प्रभावित भएका छन् ।
चीनतर्फको वैदेशिक व्यापारलाई सहजीकरण गर्न राष्ट्र बैंकले मुस्ताङ भन्सारबाट जाँचपास गरी आयात गरिने बस्तुमा एलसीको सुविधा दिने व्यवस्था गरेको हो ।