काठमाडौँ, १९ असार: प्राइम कमर्सियल बैंक लिमिटेडले सर्वसाधारण तथा संघसंस्थाहरूका लागि निष्कासन गरेको ३० लाख कित्ता ऋणपत्रमा आवेदन दिने म्याद आगामी असार ३० गतेसम्म थप गरेको छ। वार्षिक ६ दशमलव २५ प्रतिशत ब्याजदर पाइने ‘६.२५ प्रतिशत प्राइम बैंक ऋणपत्र २०९३’ नाम दिइएको उक्त ऋणपत्र गत असार १६ गतेदेखि बिक्री खुला गरिएको हो। १० वर्षको परिपक्व अवधि रहेको यस ऋणपत्रको प्रतिइकाइ अंकित मूल्य १ हजार रुपैयाँ तोकिएको छ, जसबाट बैंकले कुल ३ अर्ब रुपैयाँ संकलन गर्ने लक्ष्य राखेको छ।

कुल निष्कासनमध्ये ६० प्रतिशत अर्थात् १८ लाख कित्ता व्यक्तिगत तवरबाट र बाँकी १२ लाख कित्ता सर्वसाधारणका लागि खुला गरिएको हो, जसमा ५ प्रतिशत अर्थात् ६० हजार कित्ता सामूहिक लगानी कोषका लागि सुरक्षित गरिएको छ। सिडिएससीका अनुसार हिजोसम्म ८ हजार ६५७ जना आवेदकबाट ६१ करोड ३८ लाख रुपैयाँ बराबरको ६ लाख १३ हजार ८२५ कित्ताका लागि आवेदन परेको छ। सानिमा क्यापिटल लिमिटेड बिक्री प्रबन्धक रहेको यस ऋणपत्रमा लगानीकर्ताले न्यूनतम २५ कित्तादेखि अधिकतम सम्पूर्ण कित्ताका लागि आवेदन दिन सक्नेछन्।