एनआइसी एसिया बैंक म्युचुअल फन्डअन्तर्गत सञ्चालित ‘एनआइसी एसिया ग्रोथ फन्ड’ २८ फागुनदेखि परिपक्व हुने भएको छ । एनआइसी एसिया बैंक कोष प्रवद्र्धक तथा एनआइसी एसिया क्यापिटल लिमिटेड योजना व्यवस्थापक तथा डिपोजिटरी रहेको ‘एनआइसी एसिया ग्रोथ फन्ड’ २८ फागुनमा परिपक्व हुन लागेको हो । 

सातवर्षे बन्दमुखी योजनाको इकाइ कारोबार नेपाल स्टक एक्सचेन्जमा २५ फागुनसम्म हुने र २६ गतेबाट नै इकाइको खरिद–बिक्री बन्द हुने क्यापिटलले जनाएको छ । २५ गतेसम्म इकाइको कारोबार भई राफसाफपश्चात् कायम भएका इकाइधनी मात्रै प्रतिफलका लागि योग्य हुनेछन् । 

योजनाले विभिन्न आर्थिक वर्षमा नगद प्रतिफल वितरण गरिसकेको र उक्त वितरण गरेको प्रतिफल रकम सम्बन्धित इकाइधनीको हितग्राही खातामा उल्लिखित–अद्यावधिक बैंक खातामा जम्मा गरिसकिएको बताइएको छ । साथै, क्यापिटलले हालसम्म पनि विभिन्न आर्थिक वर्षमा वितरण गरिएको नगद प्रतिफल रकम प्राप्त गर्न बाँकी वा विविध कारणले गर्दा फिर्ता आएको इकाइधनीको विवरण क्यापिटलको वेबसाइटमा राखिएको पनि बताइएको छ । 

साथै, उक्त योजनाको इकाइ हालसम्म पनि अभौतिकीकरण गर्न बाँकी भएमा यथाशीघ्र अभौतिकीकरण गरी हितग्राही खातामा बैंक तथा वित्तीय संस्थाको खाता नम्बर अद्यावधिक गर्न आग्रह गरिएको छ । सम्बन्धित इकाइधनीले हितग्राही खातामा आफ्नो बैंक खाता अद्यावधिक गरेपश्चात् नै क्यापिटलले बाँकी रहेको नगद प्रतिफल जम्मा गर्ने बताएको छ ।