काठमाडौं । नेपाल पर्यटन बोर्ड (एनटीबी) ले आफ्नो २७औँ स्थापना दिवसको अवसरमा ’नेपाल–आसियान पर्यटन वर्ष २०२६’ मनाउने औपचारिक घोषणा गरेको छ । बोर्डका कार्यकारी प्रमुख अधिकृत दीपक राज जोशीले उद्घाटन समारोहमा आसियान मुलुकलाई नेपालका लागि उच्च सम्भावनायुक्त बजारका रूपमा प्रस्तुत गर्दै सन् २०२६ लाई लक्षित विशेष रणनीति सार्वजनिक गर्नुभयो ।
सीईओ जोशीका अनुसार हालसम्म एक लाख सात हजारभन्दा बढी आसियान मुलुकका पर्यटक नेपाल भित्रिसकेका छन्, जुन नेपालका लागि ठूलो र दीर्घकालीन बजार हो । “बौद्ध तथा आध्यात्मिक पर्यटन, प्रकृति र साहसिक पर्यटन, वेलनेस र आयुर्वेद, संस्कृति तथा समुदायमा आधारित पर्यटनमार्फत आसियान बजारमा नेपाललाई सशक्त रूपमा स्थापित गरिनेछ,” उहाँले भन्नुभयो ।
कार्यक्रम संस्कृति, पर्यटन तथा नागरिक उड्डयन मन्त्रालयका सचिव मुकुन्द निरौलाको अध्यक्षतामा सम्पन्न भएको थियो । उद्घाटन समारोहका प्रमुख अतिथि संस्कृति, पर्यटन तथा नागरिक उड्डयन मन्त्री अनिल कुमार सिन्हा तथा विशिष्ट अतिथि महिला, बालबालिका तथा ज्येष्ठ नागरिक मन्त्री श्रद्धा श्रेष्ठ रहनुभएको थियो ।
सीईओ जोशीले सन् २०२५ मा ११ लाख ६० हजार पर्यटक नेपाल भित्रिने अनुमान गरिएको जानकारी दिँदै यो संख्या गत वर्षको तुलनामा करिब ३ प्रतिशतले बृद्धि भएको बताउनुभयो । उहाँका अनुसार सन् २०२५ भित्र ३१ वटा टुरिजम मार्ट, १२ वटा ब्रान्डिङ तथा कर्पोरेट गतिविधि, २० भन्दा बढी माइस कार्यक्रम सम्पन्न भएका छन् ।
उहाँले जेन्जी आन्दोलनपछिको अवधिमा आठ वटा मुख्य पर्यटकीय गन्तव्यबाट लाइभ प्रसारणमार्फत पर्यटन प्रवद्र्धन, नौ भाषामा यात्रा सूचना प्रकाशन, ६९ वटा पर्यटन पूर्वाधार विकास तथा पूर्वदेखि सुदूरपश्चिमसम्म ४१ वटा कार्यक्रम तथा विकास गतिविधि सञ्चालन गरिएको जानकारी समेत दिएका छन् ।
“पर्यटन केबल एउटा कोर सेक्टर मात्र नभएर बहु–क्रस सेक्टर क्षेत्र हो,” जोशीले भन्नुभयो । सन् २०२५ मा विभिन्न क्षेत्रका दुई हजार छ सय पेशागत जनशक्ति तालिम प्रदान गरेको जानकारी दिँदै सीईओ जोशीले नीतिगत तहका अनुसन्धान, बजार–आधारित अध्ययन र सस्टेनेबल टुरिजम प्रोजेक्ट अन्तर्गत कञ्चनजंघा, मनास्लु र अपी–साइपालका तीन प्रमुख ट्रेकिङ ट्रेलमा सम्भावना पहिचान, गुणस्तर अभिबृद्धि, रोजगारी र बजार सिर्जनामा काम भइरहेको जानकारी गराउनुभयो ।
एनटीबीले सन् २०२६ लाई परिभाषित गर्ने सात प्रमुख यात्रा प्रवृत्ति पनि सार्वजनिक गरेको छ, जसमा– शोरभन्दा शान्ति, प्रशासनमा जेन–एआई, छनोटभन्दा विश्वास, हवाईमार्गभन्दा सडक, एकै ढाँचाभन्दा अत्यधिक व्यक्तिगत अनुभव, परीक्षण गरिएकाभन्दा अफ–ग्रिड गन्तव्य, र संस्कृति प्राथमिकतामा रहने उल्लेख छ ।
आगामी मार्गचित्र प्रस्तुत गर्दै जोशीले २०२६–२०३५ रणनीतिक कार्ययोजना, सहभागितामूलक दृष्टिकोण, डिजिटल–प्रेरित व्यावसायिकता, नवप्रवर्तनशील नीति र अभ्यासको समन्वय, स्थानीय र वैश्विक अनुभवको मिश्रण, अनुत्पादक कार्यक्रम हटाउने तथा उच्च मूल्य पर्यटनमा केन्द्रित हुने स्पष्ट गर्नुभयो ।
त्यसैगरी कार्यक्रमका प्रमुख अतिथितसमेत रहेका संस्कृति, पर्यटन तथा नागरिक उड्डयनमन्त्री अनिल कुमार सिन्हाले अन्तर्राष्ट्रिय बजारमा नेपालको पर्यटन प्रबद्र्धनका माध्यमबाट मुलुकको छविलाई उचो बनाउन गरेको योगदानको प्रशंसा गर्नुभयो । उहाँले भन्नुभयो, “सीमित बजेट र स्रोतका बाबजुद पर्यटन बोर्डले गरेको उल्लेखनीय योगदान हासिल गरेको छ । पर्यटनका माध्यमबाट दिगो विकासमा बोर्डको भूमिका महत्वपूर्ण छ ।“
त्यसैगरी महिला, बालबालिका तथा ज्येष्ठ नागरिकमन्त्री श्रद्धा श्रेष्ठले नेपाल केबल गन्तव्य मात्र नभएर अनुभव संग्रह गर्ने, प्रकृतिमा रमाएर सांस्कृतिक विविधता अवलोकन गर्ने विशिष्ट मुलुक भएको बताउनुभयो । आफूले विगत २१ वर्षदेखि नेपाल पर्यटन बोर्डमा बिताएका पलहरुको पनि उहाँले स्मरण गर्नुभयो ।
नेपाल पर्यटन बोर्डका अध्यक्षसमेत रहेका पर्यटन मन्त्रालयका सचिव मुकुन्द प्रसाद निरौलाले नेपालको पर्यटन प्रर्बद्धनात्मक गतिविधि निर्वाध अघि बढाउन आएका कानुनी तथा नीतिगत झन्झटहरु फुकाउन आफू तयार रहेको जानकारी गराउनुभयो । प्रविधिको उच्चतम प्रयोग र जनशक्ति व्यवस्थापन गर्दै बोर्डले नेपाललाई अन्तर्राष्ट्रिय बजारमा बजारीकरण गर्न आउने समस्या समाधानका लागि बोर्ड तयार रहेको उहाँले बताउनुभयो ।
त्यसैगरी बोर्डका उपाध्यक्ष रामप्रसाद सापकोटाले बोर्डले नतिजा दिने गरी काम भइरहेको उल्लेख गर्दै निजी क्षेत्र र सरकारसँग समन्वय हुने गरी कार्यक्रमहरु केन्द्रित गरिएको जानकारी गराउनुभयो ।
त्यसैगरी बोर्डको कर्मचारी संगठनका अध्यक्ष सन्तोष विक्रम थापाले कर्मचारीको वृत्ति विकास, आर्थिक विनियमावलीमा सुधार र कर्मचारी पदपूर्तिमा ध्यान दिन आवश्यक रहेको बताउनुभयो । कार्यक्रममा पाटा सीईओ नुर अहमद हमिद, वल्र्ड टुरिजम नेटवर्क र यूएन टुरिजमबाट भिडियो सन्देश जारी गरिएको छ । त्यसैगरी कार्यक्रमका अवसरमा बोर्डको वार्षिक प्रकाशन इन–फोकस पनि विमोचन गरिएको छ । कार्यक्रममा सातवटै प्रदेशका नृत्य तथा झाँकीहरु प्रस्तुत गरिएको थियो ।