बिहीबार केन्द्रीय बैंकको बैंक तथा वित्तीय संस्था नियमन विभागले ‘बचत तथा ऋणको कारोबार गर्ने सहकारी संस्थाका लागि निर्देशन तथा मापदण्ड, ०८१’ जारी गरेको छ । मापदण्डले सहकारीबाट प्रवाह भएको ऋणलाई भुक्तानी अवधिका आधार सक्रिय र निष्क्रिय ऋणमा वर्गीकरण गरेको छ । भाका ननाघेको वा भाका नाघे पनि तीन महिना नबितेको ऋणलाई असल ऋणमा वर्गीकरण गरिएको छ । सदस्यहरूको बचतको सुरक्षणमा प्रवाह गरेको ऋणलाई पनि सक्रिय कर्जामा वर्गीकृत गरिएको छ । तीनदेखि पाँच महिनासम्म भाका नाघेको ऋणलाई कमसल, पाँचदेखि १२ महिनासम्म भाका नाघेमा शंकास्पद र १२ महिनाभन्दा बढीले भाका नाघेमा खराब ऋण मान्ने उल्लेख छ । 

असल ऋणका लागि सहकारीले १ प्रतिशत न्यूनतम ऋण नोक्सानी व्यवस्था गर्नुपर्ने उल्लेख छ । कमसललाई २५ प्रतिशत, शंकास्पदलाई ५० प्रतिशत र खराब ऋणलाई एक सय प्रतिशत नोक्सानीको व्यवस्था गरिएको छ ।  बचत र ऋणको ब्याजदरबिचको अन्तर ६ प्रतिशतभन्दा बढी हुन नहुने उल्लेख छ । ब्याजदर गणना गर्दा बचत र ऋणको भारित औसत ब्याजदरलाई आधार मान्नुपर्नेछ । सहकारी संस्थाले बचतको र ऋणको ब्याजदर मासिक रूपमा पुनरावलोकन गर्न सक्ने मापदण्डमा उल्लेख छ ।