साझा अर्थ संवाददाता
१ असार २०८३, सोमवार
काठमाडौँ : अपि पावर कम्पनी लिमिटेडले आफ्नो स्वामित्वमा रहेको इङवा हाइड्रोपावर लिमिटेडको १५ लाख कित्ता शेयर दोस्रो बजारमार्फत बिक्री गर्ने निर्णय गरेको छ।
कम्पनीको सञ्चालक समितिको २०८३ जेठ २९ गते साँझ ५ बजे बसेको बैठकले उक्त शेयर बिक्री गर्ने निर्णय गरेको हो। कम्पनीका अनुसार यो निर्णय व्यवसायिक रणनीति तथा लगानी योजनाअनुसार गरिएको हो।
अपि पावरले विद्युत् नियमन आयोगले जारी गरेको विद्युत् सम्बन्धी कम्पनीको शेयरको सार्वजनिक निष्कासनको पूर्वस्वीकृति तथा नियमनसम्बन्धी निर्देशिका, २०७८ को दफा ११ बमोजिम सर्वसाधारणको जानकारीका लागि २०८३ जेठ ३० गते सार्वजनिक सूचना जारी गरेको छ।
कम्पनीले शेयर बिक्री प्रक्रिया नियामकीय व्यवस्था र बजार प्रक्रियाअनुसार अघि बढाइने जनाएको छ। उक्त बिक्रीबाट कम्पनीको आगामी वित्तीय तथा सञ्चालन योजनामा सहयोग पुग्ने अपेक्षा गरिएको छ।
दोस्रो बजारमा ठूलो परिमाणको शेयर बिक्री हुने भएकाले इङवा हाइड्रोको शेयर कारोबारमा लगानीकर्ताले आपूर्ति पक्ष र बजार प्रतिक्रिया पनि ध्यान दिनुपर्ने देखिन्छ।
