साझा अर्थ संवाददाता
११ असार २०८३, बिहिवार
काठमाडौँ, ११ असार
चालू आर्थिक वर्षको जेठ मसान्तसम्ममा नेपालमा सञ्चालित निर्जीवन बीमा कम्पनीहरूले कुल ४ अर्ब ५५ करोड ८३ लाख ४५ हजार रुपैयाँ बीमाशुल्क संकलन गरेका छन्। नेपाल बीमा प्राधिकरणको तथ्याङ्क अनुसार यस अवधिमा लघु बीमा कम्पनीहरू सहित निर्जीवन बीमा व्यवसाय गर्ने संस्थाहरूले कुल ३१ लाख ६ हजार ६ सय २२ वटा बीमालेख जारी गरेका छन्। जेठ महिनामा मात्रै कम्पनीहरूले ४१ करोड ८७ लाख ४८ हजार रुपैयाँ बीमाशुल्क आर्जन गर्दै २ लाख ७५ हजार ९ सय ७० वटा बीमालेख जारी गर्न सफल भएका छन्।
सञ्चालित कम्पनीहरूमध्ये व्यावसायिक रूपमा शिखर इन्स्योरेन्स सबैभन्दा अगाडि देखिएको छ। शिखरले जेठ मसान्तसम्म २ लाख ९७ हजार ७ सय ३४ वटा बीमालेख जारी गरी ५६ करोड २६ लाख ३७ हजार रुपैयाँ कुल बीमाशुल्क संकलन गरेको छ। त्यस्तै, सगरमाथा लुम्बिनी इन्स्योरेन्सले ४७ करोड ७३ लाख ९२ हजार रुपैयाँ र हिमालयन एभरेष्ट इन्स्योरेन्सले ४७ करोड ६० लाख ८ हजार रुपैयाँ संकलन गर्दै मुख्य प्रतिस्पर्धीका रूपमा देखिएका छन् भने राष्ट्रिय बीमा कम्पनीले सबैभन्दा कम १४ करोड २५ लाख ६७ हजार रुपैयाँ मात्र संकलन गरेको छ।
यसैगरी, बजारमा भर्खरै सञ्चालनमा आएका चारवटा लघु निर्जीवन बीमा कम्पनीहरूले पनि जेठ मसान्तसम्म कुल ११ करोड ९६ लाख ९८ हजार रुपैयाँ बीमाशुल्क संकलन गरेका छन्। लघु बीमा व्यवसाय गर्ने कम्पनीहरूमध्ये प्रोटेक्टिभ माइक्रो इन्स्योरेन्सले सबैभन्दा धेरै ३ करोड ४० लाख ६८ हजार रुपैयाँ आर्जन गरेको छ भने ट्रस्ट माइक्रो इन्स्योरेन्सले सबैभन्दा कम २ करोड ७३ लाख ५३ हजार रुपैयाँ बीमाशुल्क संकलन गरेको छ।
