बिपी कोइराला मेमेरियल क्यान्सर अस्पतालले सबै प्रदेशमा सेवा विस्तार गर्ने

किरण शिवाकोटी, चितवनः चितवनमा रहेको बिपी कोइराला मेमोरियल क्यान्सर अस्पतालले देशका सबै प्रदेशमा सेवा विस्तार गर्ने भएको छ । अस्पतालले भदौदेखि सबै प्रदेशहरुमा सेवा विस्तार गर्ने भएको हो ।
सङ्घीय सरकारको कार्यक्रमअन्तर्गत केन्द्रीय क्यान्सर अस्पतालले प्रदेशस्तरमा सेवा विस्तार गर्न लागेको अस्पतालका कार्यकारी निर्देशक डा शिवजी पौडेलले जानकारी दिनुुभयो । हरेक प्रदेशको एउटा सरकारी अस्पतालमा कम्तीमा पाँच शैयाको क्यान्सर उपचारकक्ष सञ्चालन गर्नेगरी सेवा विस्तार गर्न लागेको उहाँको भनाई रहेको छ । क्यान्सर परीक्षण गर्न अस्पतालको सेवा विस्तार गर्न लागिएको अस्पातालले जनाएको छ । कोशी प्रदेशको धनकुटा, मधेसको जनकपुर, गण्डकीको दमौली, लुम्बिनीको दाङ, कणर्ालीको सुर्खेत र सुदूरपश्चिम प्रदेशको धनगढीमा सेवा विस्तार गरिने बताइएको छ । हरेक महिना एक साता अस्पतालमा विशेषज्ञ चिकित्सकसहितको टोली विस्तारित केन्द्रमा अस्पतालले पठाउने छ ।