काठमाडौँ, २६ जेठ : सुदन गुरुङ पुनः गृह मन्त्रालयको जिम्मेवारीमा फर्किएका छन्। प्रधानमन्त्री कार्यालयका अनुसार नवनियुक्त गृहमन्त्री गुरुङको पद तथा गोपनीयताको सपथ आज दिउँसो ३ बजे राष्ट्रपतिको कार्यालय शीतल निवासमा हुने तय भएको छ।

यसअघि, व्यवसायी दीपक भट्टसँगको व्यावसायिक सम्बन्ध तथा लिबर्टी र स्टार माइक्रो इन्स्योरेन्समा सेयर लगानीलाई लिएर सार्वजनिक रूपमा प्रश्न उठेपछि गुरुङले पदबाट राजीनामा दिएका थिए। करिब ५० लाख रुपैयाँ बराबरको सेयर खरिदको स्रोतमाथि संसद् र सडकमा चर्को आलोचना भएपछि उनी जम्मा २६ दिन मात्र पदमा रहेर बाहिरिएका थिए।

सो विवादपछि सरकारले उच्च अदालतका पूर्व न्यायाधीश अच्युतप्रसाद भण्डारीको संयोजकत्वमा महालेखापरीक्षक शोभाकान्त पौडेल र नायव महान्यायाधिवक्ता अच्युतमणि न्यौपाने सदस्य रहेको ३ सदस्यीय उच्चस्तरीय छानबिन समिति गठन गरेको थियो। समितिले उनको सम्पत्ति र सेयर विवरणको सुक्ष्म अध्ययन गरी ४५ पानाको प्रतिवेदन बुझाउँदै गुरुङलाई ‘क्लिन चिट’ दिएको हो। प्रतिवेदनमा उनीमाथि लागेका आरोपहरूको पुष्टि हुन नसकेको र सम्पत्ति विवरणमा देखिएका केही प्राविधिक त्रुटिहरू व्यक्तिगत बदनियत नभई प्रणालीगत कमजोरीका कारण भएको निष्कर्ष निकालिएको छ। समितिबाट सफाइ पाएसँगै प्रधानमन्त्रीले उनलाई पुनः गृहमन्त्रीमा नियुक्त गरेका हुन्।